Jis sïjhth tjoejkedh Skarvan jïh Roltdalen åålmegemiehtjesne jïh dan byjreskisnie dle jïjnjh nuepieh.
Den Norske Turistforening åtna Bealjehkh ryøhkoe Storsjøen jïh Staaren luvhtie luvlene, jïh Selbu jïh Skierden gåajkoe jillene, jïh Meråkeren jïh Storlien noerhtene jïh Røørosen jïh Bienjedaelien gåajkoe åarjene. Daate sæjhta jiehtedh Skarvan jïh Roltdalen åålmegemiehtjie lea dïejvesen Bealjehki nuelesne. Nord-Trøndelag Turistforening, Trondhjem Turistforening jïh Svenska Turistförening medtie golmeluhkie hæhtjoeh jïh sijjieh juhtieminie, mah leah Bealjehki laajroenedtese ektiedamme. Ovrehte seamma jïjnjh hæhtjoeh nøørjen jïh sveerjen bielesne.
Tjoejkeminie, Skarvan åvtelisnie. Guvvie: Ingebrigt Garberg
Skarvan jïh Roltdalen åålmegemiehtjesne jïh Bealjehkinie 370 km ihkuve tsïeglesjamme daelvielaategh. Bealjehki Sveerjen bielesne lea 450 km ihkuve tsïeglesjamme laategh, juktie tjåanghkan 820 km ihkuve tsïeglesjamme laategh. Daate nov gujht dïhte støøremes tjåenghkies laajroenedte transnasjovnale daelvielaategigujmie abpe veartenisnie. Dannasinie daennie dajvesne hijven sjeahta tjoejkedh daelvege.
Skarvan jïh Roltdalen åålmegemiehtjesne maahta vaedtsedh :
Ramsjø-hæhtjoste– Schulz-hæhtjose: 15 km
Græsli-hæhtjoste – Schulz-hæhtjose: 20 km
Bjørneggeste – Schulz-hæhtjoste: 20 km
Mannseterbakkeste – Schulz-hæhtjose: 21 km
Synneråsen (Bleka Selbu) – Schulz-hæhtjose: 27 km
Jis vielie bïevnesh sïjhth dej ovmessie laajroej bïjre, vuartesjh Trondhjem Turistforening’en gåetiesæjroem, tt.no.
Schultz-hæhtjoe lea aktene tjaebpies sijjesne eevre sïeteregaertenen Stormoen bijjiebielesne, jïh debpede maahta Roltdalen jïh Lopmesvaerien vøøste vuejnedh, jïh daan jaepien gaahpode njoktjen 26.b. raejeste, voerhtjen 5.b. raajan. Diekie lea hijven hieljen mïnnedh.
Jis sïjhth daejredh gåabph laategh dorjeme Selbu’sne, Meråkerisnie jïh Tydalesne, maahta tsagkesidh skisporet.no. Daesnie aaj tjåådtje gosse mïnngemes aejkien laategidie bueriedi.
Edtjh bæjjese naan tjahken nille dle vihkeles voenges daajroem åadtjodh dan vaerien bïjre gaåbph ussjedamme, jïh aaj daajroeh lopmen jïh værsjoe-vaahran bïjre. Team Xitement faalehte tuvrh daejtie vaeride vuesiehtæjjine, Fonnfjellet (110 moh.) jïh Mannfjellet (1043). Jis vaajteles, dah aaj maehtieh vuesiehtæjjine årrodh gosse edtja mïnnedh tjoejkedh.
Bæjjese Gravøy-tjahken gåajkoe. Guvvie: Christine Svarva Nielsen